Mareykanka Oo Digniin Adeg U Diray Saddex Dowladdood

Mas’uul sare oo ka tirsan sirdoonka Mareykanka ayaa digniin u diray waddamada doonaya iney saameyn ku yeeshaan doorashada madaxweynaha dalka Mareykanka ee sanadkan 2020-ka dhaceyso.

War murtiyeed uu soo saaray agaasimaha Sirdoonka qaranka Mareykanka Willian Evanina wuxuu sheegay waddama shisheeye inay ku howlan yihiin “saameyn iney ku yeeshaan” cod bixinta doorashada.

Waddamadan “iney kala doorbidayaan cidda doorashada ku guuleysaneyso,” ayuu intaa ku daray.

Mas’uulkan sare ee sirdoonka Mareykanka wuxu sheegay Ruushka inuu faragelin uu ku sameeyey doorashadii 2016-ki dhacday oo uu madaxweyne Trump uu ka caawiyey ololahiisa dooorashada.

Balse Ruushka ayaa eeddaasi gaashaanka u daruuray. Madawyene Trump oo Jmcihi shir jaraa’id qabtay oo wax laga weydiiyey waxa uga qorsheysan inuu ka qaado faragelinta uu sheegay in lagu hayo doorashada Mareykanka, Madaxweyne Trump wuxuu sheegay maamulkiisu in “si dhow uu ula soconayo” arrinta.

Hadalka ka soo yeeray mas’uulka sirdoonka Mareykanka ayaa ku soo beegmaya xilli uu madaxweyne Trump uu walaac ka muujiyey codbixinta doorashada ee ay dadku ku dhiibanayaan dhanka boostada.

Turkey Oo Sheegay Inay ‘Duqeyn Ku Dilayn’ 2,200 Askar Oo Kamid Ah Ciidamada Ciidamada Dowladda Syria.

Warbaahinta dalka Turkiga ayaa daabacday in dowladda Turkiga ay duqeyn ku burbirsay saldhigyo ciidamada Syria ay ku lahaayeen magaalada Idlib ee dalka Syria.

Dowladda Turkiga ayaa sheegtay inay duqeyntaas ku burburisay sideed diyaaradood oo Helicopter, hal diyaarad oo kuwa duuliye la’aanta ah, iyo 100 Taangi oo ay lahaayeen ciidamada dalka Syria.

Wasiirka gaashaandhigga Turkiga Hulusi Akar ayaa sheegay inay duqeyntaas ku dileen 2,200 ka mid ah ciidamada dowladda madaxweyne Bashar Al-Assas, oo ku sugnaa saldhigga weerarka lagu qaaday.

Sidoo kale, wasiirka ayaa sheegay in ujeedka laga lahaa howlgalkaas uu yahay is difaacid ka dhan ah askarta taliska Asad ee weerarka kusoo qaaday cutubyo ka tirsan ciidamada Turkiga.

Duqeynta ay Turkiga la beegsatay saldhigga ay ku sugnaayeen ciidamada Syria ayaa kusoo aadayo xilli maalmo ka hor ay ciidamada Syria dileen 34 ka tirsan ciidanka dalka Turkiga.

Madaxweyne Turkiga Recep Tayyip Erdogan ayaa horey ugu hanjabay inay jawaab Militari ka bixin doonaan weerarkii askarta looga dilay.

Dowladda Turkiga ayaa sheegtay in ciidamada Turkiga ay ka shaqaynayaan sidii ay u ilaalin lahaayeen dadka rayidka ah ee maxalliga ah iyada oo qayb ka ah heshiiskii Sept. 2018 ay la galeen Ruushka, kaas oo mamnuucaya falalka gardarada ah ee aagga dib-u-celinta ee laga sameeyay agagaarka Idlib.

Mareykanka Oo Si Cad Uga Hor-yimid Ciidanka Ay DF Soomaaliya Ay Gaysay Gobolka Gedo.

Isu-duwaha dhanka siyaasadda Ee Mareykanka u qaabilsan golaha Ammaanka Ee Qaramada Midoobay, Rodney Hunter ayaa isagoo khudbad ka jeedinayey kulanka golahaasi, wuxuu ka hadlay xaaladda Ka jirta Soomaaliya.

Mr. Hunter ayaa ugu horreyn ka hadlay dhaq dhaqaaqyada ciidan ee ay dowladda federaalka ka wado gobolka Gedo ee Koonfurta Soomaaliya, wuxuuna sheegay in tallaabadaasi ay tahay mid aan la aqbali karin oo weecineyso dhaqaaliihii loogu talagalay amniga.

“Ciidamada milatariga dowladda Soomaaliya ee sida siyaasadeysan loogu daad gureeyey, looguna dagaal galiyey gobolka Gedo ma ahan mid la aqbali karo, waxayna taasi weecineysaa dhaqaalihii lagu heshiisyey ee loogu talagalay howlgallada amniga”. ayuu yiri Isuduwaha dhanka siyaasadda ee Mareykanka u qaabilsan golaha ammaanka.

Sidoo kale Mr. Rodney Hunter ayaa carabka ku dhuftay in mas’uuliyadda ciidamada dowladda iyo dowlad goboleedyada ay tahay la dagaalanka Al-Shabab, waxaana uu sheegay in la ilaaliyo isku dhac labada ciidan ah lana soo afjaro khilaafka dowladda dhexe iyo Jubbaland.

Sidoo kale wuxuu ugu baaqay madaxweynaha Soomaaliya, Mudane Maxamed Cabdullaahi Maxamed (Farmaajo) in uu soo afjaro dhaq dhaqaaqyada ciidamada dowladda ay ka wadaan degmooyinka gobolka Gedo, islamarkaana khilaafka kala dhexeeya madaxweynaha Jubbaland uu ku dhameeyo wadahadal iyo deganaan.

“Waxaan Madaxweyne Farmaajo ugu baaqeynaa in uu soo afjaro duulaanka ay ciidanka Dowladda Federaalka ka wadaan gobolka Gedo, isaga iyo madaxweynaha Jubbaland Madoobe waa in ay xoogga saaraan wadahadal iyo dib u heshisiin” ayuu  yiri isu duwaha arrimaha siyaasadda u qaabilsan Mareykanka.

Ugu dambeyn Rodney Hunte ayaa carabka ku dhuftay in sanadkaan 2020-KA Soomaaliya uu u yahay Sanad Adag, islamarkaana laga Doonayo inay wax ka qabato barnaamijka deyn cafinta, u diyaar garowga doorashooyinka soo socda iyo inay AMISOM kala wareegto amniga Dalka Soomaaliya.

Laba Ka Mida Ciidamada Turkey Oo Lagu Dilay Dalka Libya.

Laba kamid ah Askarta Dowladda Turkiga Ee ku sugan dalka Liibiya ayaa Geeriyooday sida uu xaqiijiyey madaxweynaha dalkaasi Ee Recep Tayyip Erdogan.

Wakaaladda Wararka ayaa laga soo xigtay hadal uu Yidhi madaxweynaha Turkiga Recep Tayyip Erdogan kaasoo ahaa “Labo kamid ah ciidammadeena ayaa ku shahiiday Liibiya”.

Weerarka lagu dilay askarta Dalka Turkiga ayaa waxaa soo qaaday ciidamada uu hoggaamiyo janaraal Khaliifa Haftar oo mucaarad ku ah Dowladda ay Qaramada Midoobay aqoonsan tahay ee Dalka Liibiya.

Jeneraalkaan dagaalka kula jiro Dowladda Qaramada Midoobay aqoonsan tahay ee Liibiya ayaa la rumeysan yahay inuu taageero ka helayo qaar ka tirsan wadamada Carabta oo ay ugu horreeyaan Imaaraadka Carabta iyo Masar.

Dhanka kale Dowladda Liibiya ayaa taageero ka heleyso wadamada Turkiga iyo Qatar, waxaana dhawaan halkaas ka gaaray ciidamo aad u qalabeysan oo ka tirsan Militariga Turkiga oo wato gawaarida gaashaaman.

Hadalka kasoo yeeray Madaxweyne Erdogan Ayaa kusoo Beegmaya xilli la filayo inuu Madaxweynaha Booqasho Uu Ku Tago Wadanka Azerbaijan.

Ra’isul Wasaare Lagu Soo Eedeeyey Dillka Xaaskiisii Hore Oo Maxkamad Lasoo Taagay.

Ra’iisul wasaaraha dalka Lesotho, Thomas Thabane, ayaa kasoo hormuuqday Maxkamasa ku taala dalkaasi, waxaana loo heestaa Ra’isul Wasaaraha ku lug lahaanshaha dil loo geestay Xaaskiisa.

Muuqaalo iyo Sawirro laga soo qaaday dhageysiga Maxkamada ayaa laga dhax arkayay Ra’isul Wasaare Thomas Thanabe oo wal wal badan uu ka muuqdo wajigiisa xili ay dhinac fadhisay xaaskiisa oo sidoo kale iyana qeyb ka ah dacwada kiiska dilka.

Garsoorayaasha maxkamada ayaa sheegay in dib loo dhigay dhageysiga dacwada loo heesto Ra’isul Wasaaraha si ay garsoorayaasha u helaan waqti dheeraad ah oo go’aan uga gaaraan kiiskan.

Xaaskii hore ee Ra’iisul wasaare Thomas Thabane, ayaa la toogtay sannadkii 2017-kii labo maalmood uun ka hor inta aan xilka loo caleemo saarin ra’iisul wasaaraha, waxaama kiiskan la tuhmayaa in ay ku lug leedahay xaaska uu hada qabo ra’isul Wasaaraha.

Kooxo qorsheynayay weerar oo Xabsiga la dhigay

Booliiska Jarmalka ayaa xiray Koox la sheegay inay qorsheeynayay in ay weeraraan masjid ku yaala dalkaasi, kaddib markii ay booliisku heleen xog ku aaddan falkaasi.

Mintidiinta la xiray oo ka kooban 12 qofood ayaa la sheegay in ay ka tirsan yihiin koox lagu magacaabo Der harte Kern, oo ka soo horjeedda islaamka iyo dadka magangalyo doonka ah ee jooga dalkaasi.

Siidoo kale Booliisku waxa ay baadi goob ugu jiraan xubno kale oo ka tirsan xagjiriintan kuwaasoo qeyb ka ahaa qorshaha weerarka masjidka iyo sidoo kale dadka magan galyo doonka ah.

Dalka Jarmalka waxaa ku sugan kooxaha cansuriyiinta midigta fog, oo abaabula weerarro ka dhan ah dadka Muslimiinta ah oo ay ku jiraan dadka magangelyo doonka ah.

Maraykanka, Israel iyo Imaaraadka oo yeeshay kulan qarsoodi ah oo ka dhan ah Iran

Sida ay qortay axios Dowladaha Mareykanka, Israa’iil iyo Imaaraadka Carabta ayaa yeeshay kulan qarsoodi ah oo ka dhan ah Dowladda Iiraan.

Kulankaan oo ahaa mid qarsoodi ah ayaa waxaa lasoo  sheegay inay seddexda Dowladood uga hadleen sidii xal looga gaari lahaa xiisadda u dhaxeyso Dowladaha Mareykanka iyo Iiraan si Bariga Dhexe u noqdo aag nabadoon.

Seddexda Dowladood ayaa isku soo hadal qaadayey sidii xiisadaan loogu dhameyn lahaa qaab nabadgalyo ah oo uusan dhiig ku daadan.

Wakaaladda wararka Axios oo laga leeyahay dalka Mareykanka ayaa tilmaamtay inuu kulankaan ahaa mid qarsoodi ah oo saxaafadda laga qariyey balse la ogaaday inuu ahaa mid ka dhan ah Dowladda Iiraan iyo sidii loo qiyaameyn lahaa.

Dowladaha Israa’iil iyo Mareykanka ayaa Imaaraadka Carabta u xil saaray arrimaha la xiriira Bariga Dhexe iyo xalinta Khilaafka Dowladda Mareykanka iyo Iiraan.

Sidoo kale Imaaraadka ayaa laga dalbaday inay ka shaqeyso sidii loo wanaajin lahaa xiriirka ka dhaxeeyo Mareykanka, Iiraan iyo Dowladaha Carabta.

Kulanka ayaa waxaa ka qeyb galay Sarkaal sare oo ka tirsan aqalka Sare, Safiirka Imaaraadka Carabta u fadhiyo Mareykanka iyo xoghayaha Wasaaradda Arrimaha Dibadda Israa’iil.

Netanyahu ayaa waqti badan iyo juhdi ku bixiyey sidii uu xiriir wanaagsan ula yeelan lahaa Dowladda Imaaraadka Carabta si uu ula dagaalo Dowladda Iiraan.

Madaxweyne Erdogan Oo Digniin Culus U Diray Syria Iyo Sababta Keentay

Madaxweynaha Turkey Recep Tayyip Erdogan ayaa ugu baaqay Syria inay ciidamadeeda kala baxdo goobaha kormeerka militari ee gobolka waqooyiga bari ee Idlib, halkaasi oo iskudhacyo xooggan ay ka dhaceen maalmihii tagay.

“Xilligan, laba ka mid ah 12-keena goobood ee kormeerka waxay ka dambeeyeen qadadka taliska Syria. Waxaan rajeeneynaa inay ka hor bisha Febraayo ay halkaas kala baxaan ciidamadooda,” ayuu Erdogan u sheegay xubno ka mid ah xisbigiisa AKP oo uu la kulmay.

“Haddii taliska Syria aysan ciidamadooda la bixin, Turkey waxaa waajib ku ah inay arrintan gacmaheeda wax uga qabato” ayuu yiri Erdogan.

Sideed qof oo askar Turkish iyo shacab ahaa ayaa Isniintii lagu dilay magaalada Idlib kadib rasaas ka timid ciidamada Syria.

Turkey ayaa jawaab ay bixisay ku dishay ugu yaraan 13 askari oo Syrian ah, sida ay sheegeen kooxaha la socda dagaalka Syria.

Madaxweyne Erdogan ayaa Russia, oo ah dalka ugu weyn ee taageera madaxweyne Bashar Al-Assad, ku dhalleeceeyey inay ku guul-darreysatay inay nabad ka dhaqan-geliso gobolka.

“Hadda kadib iskama indha tiri doonno tallaabo kasta oo burineysa heshiiska,” ayuu yiri madaxweyne Erdogan.

Diyaarado dagaal oo duqeymo ka geystay degaano ay heystaan Koox Mucaarad ah

Ciidanka cirka Dawladda Suuriya ayaa maalmihii lasoo dhaafay 200 oo duqaymo kala duwan ah ku garaacay deegaanada ay haystaan kooxaha mucaaradka oo ay kamid tahay magaalada Idlib.

Duqaymahaas ayaa dhacay sedexdii maalmood ee la soo dhaafay, iyadoo ciidamada Siiriya ay ku bartilmaamsadeen koocaha mucaaradka ah balse waxaa ay duqaymahaas dhibaato xoogan u gaysteen dadka rayidka ah eek u dhaqan deegaanadaas.

Wakiilka gaarka ah ee Mareykanka ee Suuriya James Jeffrey ayaa cadeeyey in duqeymahaas ay fuliyeen ciidamada cirka Siiriya oo garab ka helaya Ruushka.

Wuxuu tilmaamay in hal mid kamid ah duqaymaha ay ku dhinteen 11 qof oo rayid ah, taasoo muujinaysa dhibaatada gaaraysa kooxcaha mucaaradka inay ka badan tahay mida ku dhacaysa dadka shacabka ah.

Arbacadii lasoo dhaafay ayaa ciidamada Siiriya waxay la wareegeen magaalada Macratul Nimcaan, oo ku taal wadada weyn ee u dhaxaysa magaalooyinka Dimishiq iyo Xalab.

James Jeffrey wuxuu sheegay in ciidamada kala duwan ee Dawladda Siiriya ay arrimahaas u arkaan horumar ay ka sameeyeen dalka Siiriya, balse uma muuqato dhibaatada ku dhacaysa dadka shacabka ah.

Qaramada Midoobay ayaa asbuucii hore sheegtay in qiyaastii 390,000 oo qof  ay ka barakceen dalka Suuriya iyadoo %80 ay yihiin haween iyo carruur, waxay kaloo intaa ku dartay QM tan iyo bishii December ee la soo dhaafay inay wadanka Suuriya ka qaxeen 400,000 oo qof oo kale oo magan galyo u doontay daafaha adduunka.

Madaxweyne Trump Oo Shaaciyay Qorshihiisa Nabadeynta Bariga Dhexe

Madaxweynaha Maraykanka, Donald Trump, ayaa soo bandhigay qorshihiisii mudada dheer la sugayey ee nabadaynta Bariga Dhexe kaas oo dhigaya in magaalada Quddus noqoto caasimadda Israel ee aan qaybsamin.

Wuxu soo jeediyey in Falastiiniyiintu yeeshaan dawlad madax bannaan iyo in loo aqoonsado goobaha Yuhuudda lagu deegaameeyey ee Daanta Galbeed in ay yihiin qaybo ka mid ah dhulka Israel.