Xoogaga Kumaandooska Danab oo gacan ka helaya Ciidamada Jubbaland ayaa maanta hawlgal ka sameeyay deegaano hoos-tagga Magaalada Kismaayo ee Xarunta Gobolka Jubbada Hoose.
Saraakiisha Ciidamada ayaa sheegay in hawlgalka laga sameeyay deegaanada Golashimbi, Beerxaani, Labi Kuus iyo Cabdi Dhoore, oo dhanka galbeed kaga toosan Magaalada Kismaayo.
Intii uu hawlgalku socday ciidamada ayaa iska caabin kala kulmay maleeshiyada Al Shabaab, sida ay Saraakiishu sheegeen.
Dhamme Cabdi Cali Yuusuf oo ka mid ah Saraakiishii hawlgalka hoggaaminayay ayaa sheegay in hawlgalkaasi khasaaro lagu gaarsiiyay maleeshiyada Al Shabaab.
Sarkaalkan ayaa Jubbalandtv u sheegay intaasi ka dib inay ciidamada hawlgal amni xaqiijin ah ka sameeyeen deegaanadii ay Shabaabka ka saareen.
Gobolada Koonfurta qaarkood ayaa waxaa ka soconaya hawlgalo ka dhan ah Shabaabka hubeysan ee dalka ka dagaalama, waana xilli uu dalku doorasho isku diyaarinayo.
