Warar dheeraad ah ayaa waxaa ay kasoo baxayaan dagaal culus oo degaan ka tirsan Gobolka Jubbada Hoose ku dhex-maray Ciidamo ka tirsan Maamulka Jubbaland & Xubno ka tirsan Ururka Al-Shabaab.
Dagaalka ayaa yimid, kaddib markii sida la sheegay Xubno ka tirsan Al-Shabaab ay weerar ku qaadeen Bar-koontorool oo Ciidamo ka tirsan kuwa Jubbaland ku leeyihiin deegaanka Kulbiyow ee Gobolka Jubbada Hoose, waxaana halkaasi ka dhacay dagaal culus oo la isku adeegsaday hubka noocyadiisa kala duwan.
Dadka degaanka ayaa waxaa ay sheegeen inay maqlayeen dhawaqa rasaasta ay isku adeegsanayeen labada dhinac, sidoo kalena uu jiro khasaaro dagaalka kasoo gaaray labada dhinac iyo dad rayid ah.
Wararka la helayo ayaa waxaa ay sheegayaan in dagaalka ay ku dhaawacmeen laba ka tirsan Askarta Jubbaland ee ku sugan Barta-koontorool ee lagu weeraray.
Degaano badan oo ka tirsan Gobolka Jubbada Hoose ayaa waxaa dhowr jeer ku dagaalamay Ciidamada Jubbaland & kuwa Kenya ee ka tirsan AMISOM oo dhinac ah iyo Al-Shabaab oo inta badan weeraro geysta.
