Weerar diyaarad aan duuliye lahayn oo Ruush ah ayaa lagu dilay hal qof, lix kalena lagu dhaawacay mid ka mid ah dekedaha ku yaal gobolka Odesa ee Ukraine ee Badda Madow, sida uu Jimcihii sheegay Ra’iisul Wasaare Ku xigeenka Ukraine Oleksiy Kuleba.
“Ruushku wuxuu bilaabay weeraro ballaaran oo ka dhan ah kaabayaasha dekedaha iyo tareenada,” ayuu ku qoray Telegram.
Kaabayaasha ganacsiga, bakhaarada bacriminta iyo gawaarida, oo ay ku jiraan gawaarida xamuulka qaada, ayaa waxyeelloobay, ayuu yiri Kuleba, isagoo intaa ku daray in weerarku uu kiciyay dab.
Kuleba ma magacaabin dekedda. Xarumaha saddexda dekedood ee Badda Madow ee ku wareegsan magaalada Odesa ayaa ahaa bartilmaameedyo joogto ah, gobolkuna sidoo kale waxaa ku yaal dekedaha Wabiga Danube.
Guddoomiyaha Gobolka Odesa Oleh Kiper ayaa sheegay in kaabayaasha tamarta, warshadaha, iyo guryaha ee gobolka sidoo kale la bartilmaameedsaday.
Wuxuu hore u sheegay in weerarku uu sababay “burbur” xooggan oo ku yimid korontada, kulaylka iyo biyaha.
Kaabayaasha tareenka ee gobolka Dnipropetrovsk ayaa sidoo kale la weeraray, ayuu yiri Kuleba.
