Sonja Nientiet oo aheyd kalkaaliso u dhalatay dalka Jarmalka, isla markaana gudaha magaalada Muqdisho lagu afduubtay horraantii bishii May ee sanadkii 2018-kii ayaa xalay baraha bulshada lagu baahiyay muuqaalkeeda oo la waysanaa tan iyo markaas, ayada oo walaac laga qabay inay nooshahay iyo in kale.
Haweeneydan ayaa xilliga la afduubanayay ka howl-galeysay xarunta Hay’adda ICRC ee Muqdisho, waxayna ka shaqeynaysa arrimaha bani’aadanimada ee Soomaaliya, iyada oo markii dambe dhibane u noqatay caawinta ay dalka u timid, waxaana lagu waayay geeri iyo nolol midna, tan iyo markii la kaxeystay oo maanta laga joogo muddo 7 sano ah.
Muuqaalkeeda ayaa xalay lagu baahiyay bar Youtube ah oo shalay uun lagu furay Magaca Liiban Osman, balse aan la xaqiijin karin inuu magaciisa dhabta ah yahay, waxaana wejiga haweeneyda oo xijaabneyd ka muuqda daruuf iyo walwal xooggan,
Waxaa kale oo muuqaalka laga dhex maqlayay sawaxanka carruur iyo haween banaanka ka hadlaya, taas oo muujineyso inay lagu haayo guri ay dad kale ku nool yihiin.
Sonja Nientiet oo ku hadleysay Luqadda Engilish-ka ayaa sheegtay inay nafteeda ay ku jirto xaalad halis ah, haddii aan laga soo deynin dadka dadka haysta oo aan weli haybtooda la garan, balse raba lacag madax furasho ah, sida laga dheehan karo muuqaalka ay baahiyeen.
Sidoo kale waxa ay farriin culus u dirtay dowladda Jarmalka oo ka codsatay inay dadaal xoogleh u gasho sidii ay xorriyadeeda dib ugu heli lahayd, loogana soo deyn lahaa kooxda ay u gacan gashay ee muddadaas dheer afduub ahaanta u haysta.
Dhanka kale, fal-celin xoogleh ayaa ka dhalatay muuqaalka haweeneydan ee haatan la baahiyay, waxaana dadka Soomaaliyeed ee ka hadlay ee aad uga xumaadeen sida arxan darrada ah ee loola dhaqmay Sonja Nientiet, iyaga oo tilmaamay inay ku jirto gacanta koox cadow ah oo haddane arxan darran.
Ibraahim Cismaan: “Dhibaatada iyo daruufta ka muuqata wax yar maahan, diinteenu ma qabto qof aan waxba kuu geysan inaa dhibaateyso, Muslim iyo gaal wuxuu ahaadaba”.
Faadumo Cabdullahi: “Please calankeenna ayaa ku saaran Profile-ka hanaga suurad xumeyn haddii aad argagixiso tahay ama tuug kale”.
Ciise Faarax: “Qofka muuqaalkaan soo galiyey waxaan kuugulana talinayaa inaad gabadhaas xorriyadeeda siisaan waayo waa qof dumar ah in ku filan waad dhibteen”.
“Gabadha meel guri ah bay ku xiran tahay oo carruur ka qayl-qaylinayso bal dhegaysta saxmad ka jirta meesha,” ayey tiri Nimco Xaaji
Cabdirisaaq Ibraahim: “Fadlan, diintaada, dadkaaga iyo dalkaaga ka daa suurad xumeynta, waxaa sameeyseen ma aha dhaqan wanaagsan, 7 sano bilaa natiiyo tihiin intaa kadib iska fasaxa”.
