Israel oo xeebaha Somaliland ka sahmineysa saldhig Milateri”

Wargeyska caalamiga ah ee Bloomberg ayaa daabacay warbixin qotodheer oo ku saabsan qorshe la sheegay in Israel ay ku doonayso inay saldhig milatari uga dhisato meel ku dhow afka Badda cas.

Warbixintu waxay tilmaantay in goobta la qorsheynayo ay ku taallo qiyaastii 100 km galbeedka magaalada Berbera, oo ka tirsan dhulka ay maamusho Somaliland.

Sida uu sheegay Bloomberg, khubaro dhinaca amniga ah oo Israa’iiliyiin ah ayaa la sheegay inay sahmin ku sameeyeen goobta la qorsheynayo, iyagoo la shaqeynaya maamulka Somaliland.

Warbixintu waxay intaas ku dartay in goobtaasi ay tahay mid istiraatiiji ah maadaama ay ku dhowdahay marinnada muhiimka ah ee maraakiibta ganacsiga ee isku xira Badda Cas iyo Badweynta Hindiya.

Ujeedka ugu weyn ee saldhigga la sheegay ayaa lagu sheegay inuu yahay in Israa’iil ay halkaas ka sameyso xarun ay ka fuliso hawlgallo milatari oo ka dhan ah kooxda Xuutiyiinta ee ka talisa inta badan waqooyiga Yemen.

Xuutiyiinta ayaa xiriir dhow la leh Iran, waxaana marar badan lagu eedeeyay inay weerarro ka geystaan maraakiibta ku sugan Badda Cas iyo sidoo kale inay gantaallo ku beegsadaan Israa’iil.

Warbixinta Bloomberg ayaa sidoo kale tilmaantay in haddii qorshahan uu dhab noqdo, ay suuragal tahay in xaaladda amni ee Geeska Afrika ay saamayn ku yeelato colaadaha sii xoogeysanaya ee Bariga Dhexe.

Falanqeeyayaal amni ayaa ka digaya in arrin kasta oo saldhig milatari shisheeye ah oo ka dhasha aaggaas ay si toos ah ama si dadban ugu lug yeelan karto dalalka gobolka khilaafaadka ka socda Badda Cas.

Dhanka kale, arrintan ayaa dhalisay falcelin siyaasadeed iyo walaac ka imanaya qaar ka mid ah siyaasiyiinta iyo falanqeeyayaasha Soomaaliyeed, kuwaas oo ka digaya in qorshe kasta oo noocaas ah uu halis gelin karo amniga iyo midnimada dhuleed ee Somalia.

Waxay ku baaqayaan in arrimaha amniga iyo siyaasadda dibadda lagu maareeyo feejignaan iyo wada tashi qaran si looga fogaado in dalka uu si toos ah ugu dhex milmo xiisadaha caalamiga