Ciidamada Daraawisihta Jubbaland oo wata gaadiidka dagaalka ayaa maanta u dhaqaaqay deegaanno ka tirsan gobolka Jubbada Hoose oo ay haatan gacanta ku hayaan maleeshiyaadka kooxda Al-Shabaab.
Ciidamada oo aad u qalabeysan ayaa u raqaansaday deegaanno dhaca waqooyiga gobolka Jubbada Hoose, halkaas oo ay ka bilaabeen howlgallo ka dhan ah Al-Shabaab.
Muuqaal uu baahiyay Telefishinka Jubbaland ayaa muujinayo ciidamada oo kusii socda jiidda hore ee dagaalka, isla markaana loo dhameystiray agabkooda.
Ujeedka ugu wayn ayaa ah in ciidamadaasi ay Al-Shabaab ka xoreeyaan deegaannada dhaca waqooyiga ee gobolka Jubbada Hoose, sida ay sheegtay Jubbaland.
“Ciidamada Geesiyaasha Jubbaland ayaa howlgal ka dhan ah Argagixisada ka wada deegaanada waqooyi ee gobolka Jubada hoose” ayaa lagu yiri baahinta Jubbaland Tv.
Xaaladda ayaa haatan ah mid kacsan, waxaana dhaq-dhaqaaqyo ciidan laga dareemayaa deegaanno ka fog Kismaayo, halkaas oo ay isku fidinayaan Daraawiishta Jubbaland.
Waxaa sidoo kale howlgallo kuwaan lamid ah ay ka socdaan gobolka Jubbada Dhexe oo ay si buuxda u haysato argagixisada, waxaana lagu qaadaa duqeymo joogto ah.
Duqeyntii u dambeysay oo bartilmaameed ahayd ayaa ka dhacday gudaha xarunta degmada Jilib oo talis wayn u ah maleeshiyaadka iyo hoggaamiyeyaasha Khawaarijta.
Weerarkaasi dhanka cirka ahaa ayaa si gaar ah loola beegsaday xarunta degmada, xarunta waxa ay ugu yeeraan jabhadaha, labo xarun oo ay ku samayn jireen tababarada iyo qaraxyada iyo labo guri oo ay daganaayeen Horjooge Xasan Yacquub iyo Horjooge Amiin, sida lagu sheegay warsaxaafadeed kasoo baxay wasaaradda warfaafinta.
Maalmihii u dambeeyay ciidamada huwanta oo kaashanayaa saaxibada caalamiga ah ayaa sare u qaaday howlgallada ka dhanka ah Al-Shabaab ee koonfurta iyo bartamaha dalka.
Si kastaba, howlgallada xoogoodu haatan waxaa ka socdaan gobollada Shabeellooyinka, waxaana iska kaashanaya ciidamada dowladda iyo kuwa dadka deegaanka.
