Ciidamo katirsan Booliska Soomaaliya ayaa caawa weeraray Idaacad ku taalo magaalada Baraawe ee gobalka Shabeelada Hoose, waxeyna Xarig iyo Jirdil u geesteen weriyaal iyo xubno kamid ah maamulka Idaacadda.
Muuqaalo lagu baahiyay warbaahinta qaar ayaa muujinaya Ciidan hubeysan oo galay Idaacadda kadibna jirdil u geysanaya weriye katirsan Radio Baraawe, iyagoo markii dambe xiray dhowr weriye oo halkaas ku sugnaa.
Agaasimaha Idaacadda Baraawe Osman Aways Bahar iyo Guddoomiyaha Idaacadda, Fu’aad Shooble ayaa kamid ah dad ay jirdileen ciidanka, waxaana xilli dambe laga sii daayay Xabsiga, sida ay noo xaqiijiyeen dad ka agdhow.
Weli laamaha Ammaanka ee magaalada Baraawe kama aysan hadlin dhacdadan lagu weeraray Idaacadda, xarriga iyo jirdilka loo geystay wariyeyaasha warbaahinta ku hadashay Afka Barwaaniga.
