Boqolaal ciidan oo Macawiisley ah ayaa lagu diyaariyay gobolka Shabeellaha Hoose ee dowlad-goboleedka Koofur Galbeed.
Ciidankan ayaa ka howl-galaya deegaanno kala duwan, si ay uga garab dagaallamaan ciidanka xoogga dalka oo dagaal adag kula jira kooxda Al-Shabaab.
Mas’uuliyiin ka tirsan maamulka oo ka qeyb qaatay abaabulka ciidamadaan ayaa xaqiijiyay in Macawiisleyda loo diyaariyay sidii ay gacan uga geysan lahaayeen dagaalka ka dhanka ah Shabaab, iyagoo si gaar ah uga faa’iidaysanaya aqoontooda deegaanka.
Guddoomiyaha Lambar 50 ayaa Ra’iisul Wasaaraha Soomaaliya, Xamza Cabdi Barre, hor dhigay baahida loo qabo in xukuumadda Dan-Qaran ay bixiso mushaarka iyo garaamka ay qaadanayaan ciidamada deegaanka ee Macawiisleyda, si ay u helaan taageero dhaqaale oo rasmi ah.
Howl-gallada la qorsheeyay ayaa inta badan diiradda lagu saari doonaa dhulka u dhexeeya Afgooye iyo Marka, iyadoo ciidamadu la marsiinayo dhanka xeebta si ay uga hortagaan xubnaha Al-Shabaab ee halkaas ku sugan.
“Dadka deegaanka ee gobolka Shabeellaha Hoose waxay si iskood ah ula dagaallameen Khawaariijta, iyagoo iibsaday hubkooda iyo rasaastooda, waxaana ay qeyb ka ahaayeen dagaallo badan oo ka dhacay degmooyin kala duwan,” ayuu yiri guddoomiyaha Lambar 50.
Isaga oo hadalkiisa sii wata ayuu intaa ku daray: “Mudane Ra’iisul Wasaare, waxaan u baahan nahay garaamkooda, saadkooda iyo miisaaniyaddooda, waayo iyaga ayaa si fiican u yaqaanna dhulka u dhaxeeya Nambar 50, Abuutey ilaa Gumeysi Diid.”
Booqashada Xamza ee Lambar 50
Shalay, Ra’iisul Wasaaraha Soomaaliya, Xamza Cabdi Barre, ayaa kula ciiday gobolka Shabeellaha Hoose Ciidamada Qaranka iyo xoogagga xaq-dirirka ee deegaanka.
Ciidamadan ayaa dagaal culus kula jira Al-Shabaab, iyagoo gobolka ka wada hawl-gallo lagu ciribtirayo kooxdaas, taasoo toddobaadyadii u dambeeyay weerarro rogaal-celis ah kusoo qaaday halkaas.
Ra’iisul Wasaaraha ayaa bogaadiyey dagaalka xaqa ah ee geesiyaasha qaranka iyo kuwa deegaanku kula jiraan cadowga. Wuxuu ballan-qaaday in dowladda Soomaaliya mar walba garab taagan tahay sidii loo ciribtiri lahaa Shabaabka kusoo duulay dalka.
Booqashada uu Ra’iisul Wasaaruhu shalay ugu tagay geesiyaasha dagaalka waxay muujinaysaa sida ay madaxda dowladda uga go’an tahay xoreynta dalka iyo garab-istaagga ciidamada difaacaya jiritaanka iyo qarannimada umadda Soomaaliyeed, kuwaas oo wajahaya khatar weyn oo ka imaanaysa Al-Shabaab.
Ra’iisul Wasaaraha oo ay la socdeen koox wasiirro iyo saraakiil ah, ayaa diyaarad militeri ka raacay Muqdisho, taas oo ka dejisay deegaanka Lambar 50. Halkaas ayaa si diirran loogu soo dhaweeyey, iyadoo ay halkaasi isugu yimaadeen ciidamada qaranka iyo shacabka deegaanka.
Salaadda Ciidda markii la tukaday kaddib, ayuu Xamza u jeediyey khudbad ay dhegaysanayeen shacabka magaalada iyo ciidamada Qaranka. Sidoo kale, waxaa goobta goobjoog ka ahaa wasiirro iyo saraakiil ciidan.
Ciidamada sugayey amniga Ra’iisul Wasaaraha intii uu joogay Lambar 50 ayaa saqdii dhexe ee habeen hore ka baxay Muqdisho, iyagoo isku fidiyey dhulka miyiga ah ee u dhexeeya Muqdisho iyo Lambar 50, si ay uga hortagaan weerarro ka yimaada Al-Shabaab, iyo xitaa hoobiyaal ay soo ridaan.
Gobolka Shabeellaha Hoose ayaa kamid ah meelaha ugu halista badan Soomaaliya marka la eego dhanka argagixisada. Balse, nasiib wanaag, wafdiga Ra’iisul Wasaaraha ayaa si nabad ah ugu soo laabtay magaalada Muqdisho.
