Maamulka Puntland ayaa si adag uga hadlay dib u dhacyada howl-gallada dagaal ee ka dhanka ah kooxda Al-Shabaab.
Howl-galladan oo muddooyinkii dambe ka socday deegaanno ka tirsan gobollada Shabeellooyinka ee deriska la ah magaalada Muqdisho, kadib markii ay kooxdu dib u qabsatay deegaanno horey looga saaray.
Madaxweyne ku-xigeenka Puntland, Ilyaas Cismaan Lugatoor ayaa Madaxweynaha Soomaaliya, Xasan Sheekh Maxamuud uga digay in qorshe xumo looga qabsado magaalada Muqdisho ee caasimadda dalka.
Xasan Sheekh ayuu ugu baaqay inuu ku fara adeygo caasimadda, isla markaana uu xoojiyo howl-gallada ka dhanka ah kooxda Al-Shabaab, taasoo sanado kadib dib u muujisay damac ay ku qabsato Muqdisho.
“Waan ka xunnahay in labadii kantarool ee Afgooye iyo Balcad ay Shabaab iyo xagjir joogaan. Waan ka xunnahay, laakiin maanta wax ma tari karno,” ayuu yiri madaxweyne ku-xigeenka Puntland.
Wuxuu intaas ku daray: “Waxaan leenahay dowladda Soomaaliyeed: ku mashquul cadawga dalkii qaybo kamid ah qabsaday in aysan caasimadda qabsan.”
Ugu dambeyntii, madaxweyne ku-xigeenka ayaa caddeeyay in maamul ahaan ay masuuliyadda koowaad ee saaran tahay sidii argagixisada looga suulin lahaa guud ahaan deegaannada Puntland, xilli maamulka uu haatan wado guluf ka dhan ah kooxda Daacish.
