Hay’adda Cuntada iyo Beeraha Adduunka (FAO) ayaa ka digtay xaalad bini’aadantinimo oo sii xumaaneysa, taasoo si gaar ah u saameynaysa carruurta Soomaaliyeed.
Warbixin cusub oo ay hay’addu soo saartay 29-kii Maarso 2025 ayaa muujisay in in ka badan 4.6 milyan oo qof ay la daalaa dhacayaan cunno yari daran inta u dhaxeysa Abriil iyo Juun 2025, halka 784,000 qof ay qarka u saaran yihiin xaalad deg-deg ah oo nafaqo-xumo ah (IPC Heerka 4).
Daraasadda FAO waxay sidoo kale iftiimisay halista nafaqo-darro ee carruurta, iyadoo 1.8 milyan oo carruur ah oo da’doodu u dhaxayso 6–59 bilood ay wajahayaan nafaqo-xumo, halka 479,000 ka mid ah ay qabaan nafaqo-xumo daran (SAM).
Dhibaatadan bini’aadantinimo waxaa sababay arrimo dhowr ah oo ay ka mid yihiin: Yaraan ku timid gargaarka bini’aadantinimo, dagaallo iyo barakac baahsan iyo sicir barar sare oo saameeyay qiimaha cuntada.
Sidoo kale waxaa qeyb ka ah halista taagan, roobabkii Gu’ga 2025 oo la filayo inay yaraadaan, xarumaha caafimaadka oo xirmay iyo adeegyada nafaqeynta oo hakad galay.
FAO ayaa ugu baaqday beesha caalamka inay si degdeg ah u xoojiso dadaallada gargaarka si loo yareeyo saameynta nafaqo-xumada.
“Xaaladda Soomaaliya waxay gaartay heer aad looga walaaco, waana in la qaadaa tallaabo degdeg ah si loo badbaadiyo carruurta iyo qoysaska nugul,” ayaa lagu yiri warbixinta.
