Dowladda Federaalka Soomaaliya ayaa lasoo warinayaa in ay kala dooratay dalalka Itoobiya iyo Masar oo ku wadajira howlgalka cusub ee AUSSOM, waxayna kordhisay doorka Itoobiya ee howlgalkan oo sanadkan ka bilowday gudaha Soomaaliya.
Wararka ayaa sheegaya in Itoobiya ay door weyn oo muhiim ah ku yeelaneyso howlgalka cusub ee lagu taageerayo xasiloonida Soomaaliya oo uu dadaal badan ku bixinayo Ururka Midowga Afrika oo uu hoostago howlgalkan oo muddo dheer soo jiray.
Warbixin lagu daabacay Wargeyska Addis Ababa Standard ayaa waxaa lagu sheegay in haatan Itoobiya ay qorsheyneyso in howlgalka AUSSOM ay ku biiriso ku dhawaad 2,500 oo askari, taas oo ka dhigeysa dalka labaad ee ciidamada ugu badan howlgalka cusub.
Uganda ayaa ah waddanka koowaad ee ciidamada badan, waxayna Soomaaliya usoo dirtay illaa 4,500 oo askari.
Dhanka kale, warbixinnada soo baxaya ayaa muujinayo in hoos loo dhigay kaalinta Masar ee ku aadan howlgalkan, maadaama sare loo qaaday doorka Itoobiya oo ay haatan ku xifaaltamayaan gudaha Soomaaliya, iyaga oo ku bixinayo galaangallo xoogan.
Masar ayaa markii hore loo qorsheeyay in Soomaaliya ay usoo dirto kumanaan askari, iyada oo la filayay inay howlgalka cusub ku hoggaamiso 5,000 oo askari, balse waxay haatan yeeleneysaa tiro aad kooban oo marka leego ka yar qoonada la siiyay Itoobiya.
Arrintan ayaa loo sababeynayaa isbeddalka ku yimid xiriirka Muqdisho iyo Addis Ababa oo haatan soo hagaagay, kadib markii ay labada dhinac heshiis ka gaareen khilaafkii u dhexeeyay ee ka dhashay heshiiska badda ee ay Itoobiya la gashay Somaliland.
Waxaa kale oo laga soo xigtay Addis Ababa Standard, in Dowladda Soomaaliya ay Itoobiya ka dooneysoin ay joojiso faragelinteeda dibadda, gaar ahaan taageero ay siineyso qaar kamid ah maamul goboleed dalka, sida Jubbaland iyo Puntland.
Soomaaliya ayaa horay labada dal oo sidoo kale isku hayay arrinta wabiga Nile ula soo gashay heshiisyo wajiyo kala duwan leh, balse uu ugu muhiimsan yahay iskaashi difaac ah, taas oo su’aalo laga keenay sida ay ku suurageli karto in labada dal la’isku wado.
Si kastaba, Muqdisho iyo Addis Ababa ayaa khilaaf soo socday muddo sanad ah dhowaan soo afjaray, kadib markii hoggaamiyeyaasha labada dal ay booqashooyin is dhaafsadeen, kadibna ay xal rasmi ah ka gaareen xiisaddii u dhexeysa labada dal ee dariska ah.
