Jeneraal Sheegow oo u xiran dowladda federaalka Soomaaliya ayaa waxaa ku dhacay xanuunka Kansarka Beerka, sida uu sheegay wasiir ku xigeenka wasaaradda warfaafinta HirShabeelle Cabdishakuur Shaashaa oo wareysi xasaasi ah siiyey SYL Somali TV.
Shaashaa ayaa si cad u sheegay in dowladda federaalka ay daryeel caafimaad u diiday Jeneraal Sheegow, isla markaana hadii uu dhinto ay u heystaan xubno uu sheegay inuu si gaar ah ugu xiran yahay.
“Dowladdu waxay wadaa mujaamalo iyo iska dabawareejin, hal maalin iskama xil saarin in Sheegow uu daryeel caafimaad helo, mar kasta ayaan kala hadalnaa xaaladiisa,” ayuu yiri
Wasiirka ayaa sidoo kale sheegay, in Sheegow markii hore laga helay xanuunka Cagaarshow-ga, balse markii uu waayey daryeel caafimaad uu isku bedelay Kansar.
“Ninkaas waa maxbuus dowladda u xiran, wuxuuna xaq u leeyahay inuu helo daryeel caafimaad, hadda waxaa naloo sheegay in dalka aan wax looga qaban karin, marka waxaan ka rabnaa dowladda inay masuuliyadeeda badbaadinta salkaalkaas gudato, waa nin dalka wax badan u soo qabtay,” ayuu yiri.
Wasiir Shaashaa ayaa wareysigaan ku sheegay in xaaladda caafimaad ee Jeneraal Sheegow aan dalka waxba looga qaban karin, sida ay dhakhaatiiru u cadeeyeen.
“Hadii xaaladiisa ay dowladdu sidaan ku sii fiirsato waxaaan u arkeynaa inay tahay wax ay ku tala gashay, kharash kasta oo daaweyntiisa ku baxaya waxaan uga baahanay dowladda, sidoo kale waxaan rajeyneynaa in cafis loo fidiyo, si xaaladiisa loola tacaalo, nin xaalkiisy heerkaan gaaray, inuu xabsi ugu jiro ma garan karno faa’iidada ugu jirta dowladda,” ayuu yiri Wasiir Shaashaa.
wardeeq news waxay ogaatay in dhowr toddobaad ka hor Jeneraal Sheegow la geeyey mid kamid ah isbitaallada Muqdisho, dabiib caafimaad kadibna waxaa lagu celiyey xabsiga.
“Hadii Jeneraal Sheegow uu sidaan ku dhinto dowladda ayaan kula xisaabtameynaa maalintii aan awoodno, adduunka maanta iyo beri maaha, waxaa imaa doonta maalin aan la xisaabtami doono shakhsiyaadka uu u xiran yahay Sheegow,” ayuu hadalkiisa ku soo gabagabeeyey Wasiir Cabdishakuur Shaashaa oo HirShabeelle ka tirsan
