Dowladda Federaalka Soomaaliya, ayaa shaacisay in iyadoo kaashanaysa Taliska AFRICOM ee Ciidamada Mareykanka, ay gobolka Bari ka fuliyeen duqeymo ay beegsadeen kooxda Daacish, halkaas oo khasaare culus lagu gaarsiiyey kooxda.
“Duqeyntan oo dhacday maanta, waxaa lagu beegsaday maleeshiyaad iyo horjoogayaal ka tirsan Khawaarijta Daacish, kuwaas oo isku aruursanayay koonfur-bari magaalada Boosaaso ee Puntland,” ayaa lagu yiri war-saxaafadeed ka soo baxay wasaaradda warfaafinta Soomaaliya.
Dowladdu waxay sheegtay in howlgalkaas lagu taageerayay dadaallada Ciidanka Daraawiishta Dowlad Goboleedka Puntland ee lagu ciribtirayo Khawaarijta Daacish.
“Qiimeynta horudhaca ah ee howlgalkan waxay muujinaysaa in xubno badan oo ka tirsan ISIS la dilay, iyadoo aanay jirin wax rayid ah oo waxyeello soo gaartay,” ayaa lagu yiri warkaan.
Sidoo kale, Dowladda ayaa balan-qaaday in ciidamada Puntland ay ka sii taageeri doonto howlgallada ay ku ciribtirayaan Daacish, waxayna hoosta ka xariiqday inay kaashan doonto Mareykanka iyo saaxiibada kale ee caalamka.
“Dowladda Federaalka Soomaaliya oo kaashanaysa saaxiibada caalamka, sida Taliska AFRICOM ee Mareykanka, waxay sii wadi doontaa dagaalka lagu ciribtirayo kooxaha argagixisada ah, sida ISIS iyo Al-Shabaab, kuwaas oo khatar ku ah nabadgelyada Soomaaliya iyo caalamka,” ayaa lagu yiri warkaan ka soo baxay dowladda federaalka.
Puntland ayaa dhowr mar oo hore sheegtay in taageeradii dowladda federaalka ay uga baahnaayeen aysan ka helin, halka dowladda federaalka ay mar kasta sheegto in Puntland ay ku garab siiso dagaalka, diyaarna ay ula tahay wax kasta oo ay soo weydiistaan.
Khilaafka Xasan Sheekh iyo Saciid Deni ayaa sababay in dowladda federalka ay taageero muuqata ku yeelan weyso dagaalka Daacish ee Ciidamada Puntland ay uga jiraan dhulka buuraleyda ah ee gobolka Bari.
Ciidamada Puntland ayaa hormar weyn ka sameeyey dagaalka Daacish ee ka socda gobolka Bari, waxayna ku dhowyihiin in buuraha Calmiskaad ay ka sifeeyaan kooxda, howlgalka ayaa galay wajigii sedaxaad, sida uu sheegay Madaxweynaha Puntland Saciid Deni.
