Madaxweynaha Koonfur Galbeed, Cabdicasiis Xasan Maxamed (Lafta-gareen) ayaa xalay Degmada Waajid ee Gobolka Bakool kula kulmay Odayaasha Dhaqanka ee degmadaasi.
Madaxweynaha ayaa hoyga uu ka degan yahay degmadaasi ku qaabilay Odayaasha Dhaqanka, oo uu kala hadlay xaaladda degmada.
Degmada Waajid ayaa waxaa ka jirta xaalad adag oo ka dhalatay go’doominta ay degmadaasi ku hayaan maleeshiyada Al Shabaab.
Odayaasha ayaa Madaxweynaha u sheegay tan iyo markii la qabtay degmadaasi, sanadkii 2014 inay Shabaabku ku hayeen go’doomin, taasoo ay xoojiyeen billihii la soo dhaafay.
Madaxweynaha ayaa kulanka ka sheegay in uu jiro qorshe uu maamulkiisu dib ugu furaayo wadooyinka xiran, go’doomintana looga saarayo degmadaasi.
Madaxweynaha oo Sabtidii shalay gaaray degmadaasi ayaa ka sheegay in la isku furi doono Waajid iyo Baydhabo, Waajid illaa Xudur, sida uu yiri.
Tan iyo daba-yaaqadii sanadkii hore ayaan waxaan degmadaasi imaan gaadiidkii sida qarsoodiga raashiinka ku soo gelin jiray, ka dib markii ay Shabaabku kordhiyeen xeeladooda go’doominta.
Shabaabka ayaa wadooyinka soo gala Degmada Waajid ku gubay gaadiid u rarnaa ganacsato deegaanka ah, sababtuna tahay iyagoo u arka kuwa jebiyay awaamiirtoodii.
