Ugu yaraan toddobo qof ayaa lagu dilay Myanmar ka dib markii ciidamada amniga ay rasaas ku fureen dibadbaxayaasha ka soo horjeedka afgambiga, sida ay sheegeen goobjoogayaal iyo warbaahinta maxalliga ah, iyada oo dowladda militariga ee Myanmar ay ku eedeysay hoggaamiyihii xilka laga qaaday Aung San Suu Kyi in ay aqbashay lacagaha sharci darrada ah.
Rabshadaha ayaa yimid ka dib markii Golaha Amniga ee Qaramada Midoobay uu ugu yeeray militariga in ay “xakameeyaan ugu badnaan” jawaabta ay siinayaan mudaaharaadayaasha nabadeed iyo kooxda xuquuqda aadanaha ee Amnesty International ayaa ku eedeysay militariga in ay qaateen xeeladaha dagaalka ee ka dhanka ah banaanbaxayaasha nabadeed.
