Wafuud ka kala socda Dhaqdhaqaaqa XAMAAS iyo Israel ayaa la filayaa inay Kulan ku yeeshaan Caasimadda dalka Masar ee Qaahira, si ay uga wada hadlaan qorshaha ay isku dhaafsan doonaan Maxaabiista ay kala haystaan.
Madaxa Sirdoonka Masar, jeneral Cabaas Kaamil ayaa waxaa uu Kulamo la yeeshay Madaxda Reer Falastiin iyo Israel, si ay uga shaqeeyaan meel-marinta Xabbad-joojinta laga gaaray Dagaalkii Qasa iyo inay XAMAAS iyo Israel ka wada xaajoodaan qorshaha ay isku weydaarsan karaan Maxaabiista ay kala haystaan.
Hoggaamiyaha Dhaqdhaqaaqa XAMAAS ee magaalladda Qasa, Yaxye Sinwaar ayaa sheegay in loo baahan yahay in laga wada hadlo sidii loo sii dayn lahaa Falastiiniyiinta ku lug lahaa weerarkii ugu dambeeyey ee ay Israel ku soo qaaday Deegaanadda Marinka Qasa iyo magaalladda Qasa.
Ilo ka tirsan XAMAAS ayaa sheegay inay khasab tahay inay Hoggaamiyayaasha Falastiin ee u xiran Israel oo uu ka mid yahay Marwaan Al-barquuti qeyb ka noqdaan qorshaha is-dhaafsiga Maxaabiista.
Dhinaca kale, Israel ayaa doonaysa inay wada-xaajood kala galaan Dhaqdhaqaaqa XAMAAS sidii loo sii dayn lahaa 4 Maxbuus oo Israeli ah oo 2 ka mid askar yihiin, oo XAMAAS u xiran.
Ilaa 4,500 Maxaabiis Falastiiniyiin ah ayaa ku xiran Xabsiyadda Israel.
