Ra’iisul Wasaaraha XFS Mudane Xamse Cabdi Barre ayaa khudbad ka jeediyay munaasabad ballaaran oo ay soo abaabuleen aqoonyahanno wax ku soo bartay dalka Malaysia oo ay ku jiraan mudaneyaal ka tirsan BFS, taas oo lagu soo dhaweynayay magacaabistii iyo kalsooni siintii Baarlamaanka ee Ra’iisul Wasaaraha.
Ra’iisul Wasaaraha XFS Mudane Xamse Cabdi Barre ayaa sheegay in ay nasiib darro tahay in Shacabkeennu gaajo iyo harraad u dhintaan iyadoo ay biyaha webiyadu u muuqdaan, dalka intiisa badanna la isugu safro diyaarado sababo ammaan dartood, taas oo dowladda iyo shacabkaba uga baahan isbaddel dhab ah.
Waxaa uu sheegay in uu soo dhisi doono xukuumad tayo leh oo dalka ka saarta dhibaatada culus ee ka taagan ee dhanka Ammaanka, Abaaraha iyo Musuq maasuqa.
Waxaa uu xusay in xukuumaddiisa ay kasoo dhex muuqaan doonaan xubno lagu yaqaano karti iyo ka shaqeynta Amniga dalka ayna muhiim tahay in la helo ciidan Tayaysan.
Xamse ayaa xusay in xafiiskiisa iyo Ammaankiisa ay ilaaliyaan ciidamo Shisheeye, taasina ay tahay nasiib daro heysta umadda Soomaaliyeed.
