Daafaca kooxda kubadda cagta Manchester City ee Ruben Dias ayaa ku guuleystay abaal-marinta laacibka sanadka ee FWA fasal ciyaareedkan 2020-21.
FWA waa abaal-marin ay bixiyaan ururka qorayaasha Premier League ee ‘Football Writers’ Association’, kaasoo ay siiyaan laacibka sanadka ee horyaalka Ingiriiska.
Ruben Dias ayay Man City kala soo saxiixatay kooxda Benfica xagaagii la soo dhaafay, waxaana ay kula soo wareegeen Adduun dhan 64 milyan oo gini, kooxda Tababare Pep Guardiola ayuuna horraantii bishaan kula guuleystay horyaalka Premier League.
Dias ayaa helay codad badan si uu ugu guuleysto abaal-marinta FWA, waxaana uu ku garaacay abaal-marintan xiddigo ay ka mid yihiin laacibka khadka dhexe ee Manchester United Bruno Fernandes, Weeraryahanka Tottenham ee Harry Kane iyo xiddiga ay Man City ka wada tirsan yihiin ee Kevin De Bruyne.
24-sano jirkaan ayaa ku raaxaystay xilli ciyaareedkiisii ugu horreeyey England, waxaana uu ciyaaray 48 jeer tartammada oo dhan, isagoo dhaliyey hal gool.
