Guddiga maamulaya doorashada Xildhibaanada Banaadiriga ayaa doortay Guddoomiyaha Guddiga iyo ku-xigeenkiisa, kadib markii Maanta kulan ku yeesheen Magaalada Muqdisho.
Guddoomiyaha Guddiga Xildhibaanada Banaadiriga ayaa waxaa loo doortay inay noqoto Marwo sacdiyo Aweys Cali Boolay oo heshay 11 Cod, mana jirin Musharax kale oo doorashada kula tartamay.
Sidoo kale xubnaha Guddiga maamulaya doorashada Xildhibaanada Banaadiriga ayaa Guddoomiye ku-xigeenka Guddiga u doortay Maxamed Xaaji Maye oo isna helay 11 Cod, mana jirin Musharax tartan la galay.
Maalmihii lasoo dhaafay ayaa waxaa Magaalada Muqdisho ka dhacayay doorashooyinka Guddiyada maamulaya doorashooyinka dalka ka dhacaya, kuwaasi oo soo kala magacaabeen Dowladda iyo maamul Goboleedyada.
Guddiyada maamulaya doorashada heer Federaal, kuwa xalinta khilaafaadka, iyo kuwa maamulada Puntland, Galmudug iyo Koonfur Galbeed ayaa doortay Guddoomiyeyaasha Guddiyada iyo ku-xigeenadooda.
