Wafdi ay hoggaamineyso Wasiirka Gargaarka & Maareynta Masiibooyinka Somaliya, Khadiijo Maxamed Diiriye ayaa maanta gaaray Magaalada Baydhabo ee Gobolka Baay.
Wafdigan oo ka ambabaxay Garoonka Aadan Cadde ee Magaalada Muqdisho ayaa waxaa Garoonka Shaati-gaduud ku soo dhaweeyay xubno ka tirsan Golaha Wasiirada ee Koonfur Galbeed, Agaasimaha Guud ee Madaxtooyada Koonfur Galbeed iyo xubno kale.
Wafdigan ayaa Magaalada Baydhabo u tagay, sidii dadka ku dhaqan deegaanada Koonfur Galbeed loo gaarsiin lahaa deeq raashiin ah, oo ay Dowladda Federaalka ugu talagashay qoysaska ay abaaruhu saameeyeen.
Qaybo ka mida gobolada dalka ayaa waxaa ka jira abaaro la sheegay inay ka dhasheen roob yari, iyadoona labadii xilli roobaad ee ugu dambeysay aanay dalka ka da’in roobabkii la filayay.
